Sistema Barlake

Sistema Barlake ba dame

Naturalmente sociedade ida iha nia cultura no lisan, maske nia lalaok diferente.  Husi lalaok diferente, mak ema  descobre katak,  cultura  ou lisan iha Timor leste mesak furak.   Cultura hirak nee husi kedas  Bei-ala sira, maske  balun  emita ona ho rai seluk.  Sistema Barlake  nebe aman - inan, avo no tiu sira pratica wainhira  oan feto, alin feto,subrinha ou  bin  too ona tempo  atu forma  uma kain, molok ba too uma creda simu graça sacramento matrimônia, família entre feto no mane, tuir cultura Timor famozu ho naran fetosan no umane hahu  uluk  ho  Barlake.

Definição balun nebe  sita husi internet  iha lian português nunee; “ Barlake é uma atitude típica do povo timorense que leva a um contrato matrimonial segundo os usos e costumes tradicionais: origina uma troca de bens de valor equivalente entre as famílias dos noivos. A família do noivo deverá dar búfalos, cavalos, cabritos, Belak (um medalhão timorense) e uma espada, o Surik. (http://www.prof2000.pt/users/comefeito/comefeito10/curiosidades.htm).

Tuir costume família husi noiva,(umane) fo animal hanesan fahi,tais,fos no mortem  ba  família noivo.  Barlake nee uso costume iha território timorense,  geralmente bai-bain iha animal barak atu  proporciona casamento ida  diak ba oan sira, normalmente  envolve  família  rua husi niovo no noiva.  Liu tiha nee inan-aman husi feto no mane  combina  atu termina condições  ba casamento.  Tuir lolos  Barlake  laiha sentido negativo, maibe ho  intenção  atu  valoriza  noiva  no  agradece ba  família tanba kuidado ona nia oan to adulto.  Fo Barlake  la  significa  feto sai criado, maibe cumpri  tradição.

Vantagem lubuk ida mak haksumik hela iha sistema  Barlake,  tanba nia valor cultural   positivo ba comunidade.  Barlake  katak fo no simu, (família husi feto nunee mos mane tau buat ruma iha oin, nudar simbolo atu koinese malu). Noiva nia família considera família Noivo   hanesan fetosan, nunee mos  familia Noivo hanesan umane.

Valor positivo seluk  mak hametin relação entre família ida ho família ida seluk nebe diferença cultura, lian, custome no seluk tan. Sistema  Barlake  laos sistema aat, maibe único  ba povo Timor Leste, nudar heransa husi   Bei-ala sira.  Parte negativo mosu, wainhira ema entende sala,  hatudu nia egosimo, iha intenção négocio, obriga ema seluk atu fo osan, animal, no  fo todan liu ba noivo ho nia família.

Barlake  iha forsa ida atu contribui ba paz, tanba liu husi Barlake família ida nebe nunka koinese  malu bele koinese no simu malu nudar família ida, maibe sei lacontribui ba paz, wainhira ema aprezenta liu nia parte negativo do que positivo.  

Dr. Sara Niner husi Monash University, prepara nia materia Seminar ho painel timor oan,iha centro estudo conflito no dame UNTL, kona ba  oinsa barlake muda iha  Timor leste? Ou Is barlake changing in timor-leste? Fo  Definição  ida kona ba   Barlake nunee; Barlake hanesan parte ida  husi sistema  adat emgeral  ne’ebé dezenvolve ona iha tinan rihun hira liuba husi bei-ala sira hodi regula sosiedade iha ambiente difisil.

Atu dehan Barlake regula família  no sosiedade hodi  tane  soliedaridade no harmonia social ,tanba Barlake  atu  valoriza no proteje feto.  Barlake hanesan dowry;  presente husi umane ba fetosan no bride-price katak ; presente husi fetosan ba umane-hanesan ‘pagamento.  Sasan nebe fo  husi família feto no mane,(balas-membalas) nee simbolo relação famíliar no unidade.

Tanba nee  Barlake nia folin  la bele liu família nia capasidade.  Ema ida la bele obriga família ida atu selu liu fali sira nia  rico soin, ne’e  laos  razão diak husi Barlake.  Husi nee maka bele kria paz no dame entre família boot rua nebe hamutuk, tan casamento ida nebe hahu ho sistema  Barlake.

 Barlake  ho nia akto lubuk ida. Primeiro;  tuku  odamatan ou husu licensa. Segundo;  fo aitukan be manas ou inan-aman nian kolen.  Terseiro; hafolin feto, fo  sasan husi família  mane   ba feto, atu lori feto  sai husi nia uma no knua  ba uma lisan seluk nebe  pertensi ba  mane.  Barlake laos faan ema,(feto),maibe fondasi ba família foun, rekonese, tane aas dignidade feto. Barlake laos fo deit, maibe mos simu, maibe ohin loron tanba deit buat  foun barak, ema  interprreta  Barlake tuir ida-idak nia pensamento.

Barlake  laos  obriga malu atu fo osan barak. Laos hatudu riku soin no atu sosa feto.  Barlake laos atu halo feto sai atan ba mane ho nia família.  Maibe sai husi lisan ida ba lisan seluk ho dignidade. Barlake sasin uluk relação ida, atu família sira bele apoio malu iha loron ikus wainhira infrenta dificuldade. Legaliza casamento culturalmente.  Husi hanoin positivo sira nebe aprezenta  liu ba, hakarak fanu netik timor oan sira katak,  Barlake  maka costume ida nebe Timor Leste iha, atu hanai no simu malu hanesan maun-alin no família ida deit.   

Barlake  nia contiudo  maioria  positivo do que  negativo.  Negativo nee mosu,wainhira ema  entende sala   Barlake, então halo comunidade precupado no halo mane sira foti aan.  Tuir  lolos  sistema  Barlake  maka  atmosfera ida husi sistema patriarchal  atu promove  igualidade genero, respeita direito no kria paz.  Iha Barlake  laos fo deit no simu deit, maibe   nudar fetosan no humane relação  sei lakotu husi geração ba geração.

Barlake  tuir lolos  fo folin ho balansu no iha lejitimidade wainhira  tuir duni tradição.  Troka sasán ba malu ne’e simbolikamente hanesan faktos ida atu aprezenta katak,  sasán ne’ebe noivo nia  família fo ba noiva nia família  hatudu katak família rua nee iha ona relação familiar.

Barlake  costume positivo ida nebe, Bei-Ala sira husik hela ba nia geração sira to ohin loron, maibe  implementação ba costume nee, ohin loron diferente ho tempo uluk. Bei-ala sira uluk koalia Barlake  laos ho osan, maibe ho sasan hanesan Belak, Mortem, surik, animal hanesan  karau,kuda,nst, alias Barang Jadi, maibe ohin loron sasan hirak nee, fatin balun deficil atu hetan, tanba nee ema troka ho osan.

Maneira ida troka ho osan, maka muda ema nia hanoin katak Barlake nee folin nebe ema bele cosnidera hanesan sosa, maibe uluk  lae, fo Barlake katak  hafolin feto, rekoinese nudar ema foun ida, atu tama iha família foun ida, nebe pertensi ba lisan ida. Tanba feto ida nebe atu mai iha família ida nee, ema foun laos uma lisan ida nee nia  geração. Importante ba timor oan sira maka oinsa compriende parte positivo husi Barlake nee, atu  hadia família,halo família nee sai forte liu tan, hodi kria paz iha sociadade.

To ona tempo ba  gerasaun tuan, lia nain sira, atu adapta  no  moderniza sistema Barlake nee tuir   ritmo  moderno.  Nunee bele halo mudansa ida significativo ba  Barlake  nee rasik, atu nunee bele involve foin sa’e sira. se  lae gerasaun foun sira nebe lainvolve iha cerimônia  sira Barlake nian,  laiha koinesemento diak no experencia, ikus  mai  costume nee bele lakon iha futuru.  Dezafiu seluk geração foun  sira lahanoin atu promove parte positivo husi Barlake .  

   

Sistema ida. Istilo moris ida, consepto ida, sempre iha nia vantagem no desvantagem.  Valor  diak husi pratika hirak nee sempre iha, maibe desvantagem mos compete, atu labele mout  iha  desvantagem nia ukun, ema ida – idak tenki  estuda no apriende  oinsa educa-an ho vantage, hafoin rejolve desvantagem nebe existe. Maluk  sira, hein hanoin badak nee fo inspirasaun foun, atu bele entende diak liu tan kona ba  ”Sistema Barlake Ba Dame “ bom aproveita. (Angel)